cümə, 29 may 2020

Səsli axtarış 2020-ci ildə rəqəmsal marketinqə necə təsir edəcək?


Anar Abdullayev


271

Səsli axtarışı mümkün edən cihazlardan istifadə istehlakçıların gündəlik yaşamının bir parçasına çevrilir. PWC-nin hesabatlarına görə 25-49 yaşında olanların 65%-i gündə ən az bir dəfə səsli cihazdan istifadə edir. Bu yaş aralığında olanlar, səsli axtarışlardan gündəlik istifadə ehtimalının ən yüksək olduğu qrupdur, onun arxasınca 18-24 və 50+ yaş olanlar gəlir. 25-49 yaşlılar ən fəal qrup olmasına baxamayaraq, 18-24 yaş aralığında olanlar, texnologiyanın daha erkən yaşlardan istifadəsi göstəricilərinə görə daha irəlidədirlər.

25-64 yaş aralığında olanların 61%-i gələcəkdə səsli cihazlardan daha çox istifadə edəcəklərini bildirirlər. 18-24 demoqrafik qrupunda da bu tendensiya müşahidə olunur - bu qrupdan olanların 57%-i yaxın illərdə səsli cihazlardan istifadəni artıracaq.

Geyilə bilən cihaz sahiblərinin 71%-nin gələcəkdə daha çox səsli axtarışdan istifadə edəcəyi proqnozlaşdırılır. Planşet və səs dinamiki istifadəçilərində də artan göstəricilər olacaq.

Google şirkətinin verdiyi rəqəmlərə görə istifadəçilərin 52%-nin evin qonaq otağında səs "köməkçisi" dinamiki var, 25%-i bu cihazlardan yataq otağında, 22% isə mətbəxdə istifadə edir.

İstehlakçıların 93%-i səsli köməkçilərindən razı olduğunu bildirib. Səsli interaktiv dinamiklərdən istifadənin üstünlükləri arasında suallara dərhal cavab ala bilmə imkanı və çoxfunksiyalılıq (multasking) xüsusilə qeyd edilir. Amazon Echo və ya Google Home sahibi olan insanların 65%-i smart səsli dinamik sahibi olmamışdan əvvəlki zamana qayıtmağı təsəvvür edə bilmir. Bir çox insan üçün smart, yəni "ağıllı", dinamiklər yalnız cihaz deyil, həm də formlaşan yeni həyat tərzinin bir parçasıdır.

2020-ci ildə səsli axtarışlar bütün onlayn axtarışların yarısını təşkil edəcək. Səsli axtarışın gətirdiyi bu inqilab, istehlakçıların şirkətlərlə və brendlərlə necə əlaqə quracağını köklü şəkildə dəyişəcək. Rəqəmsal varlıqlarını səsli axtarışa görə optimizasiya (SEO) edən şirkətlər rəqiblərindən bir addım öndə olacaqlar.

Səsli Axtarış və SEO

SEO dedikdə səsli axtarışla yazılı axtarış arasındakı müqayisəyə və axtarış motorunun verdiyi nəticələrə diqqət yetirmək lazımdır. İnsanlar səsli axtarış edərkən axtarışın forması dəyişir. Yazılı axtarış etdiyiniz zaman noutbuk və ya smartfonda “Bakıda səhər yeməyi” deyə sorğu göndərə bilərsiniz. Ancaq səsli axtarış zamanı sorğu çox güman ki sual formasında olacaq – “Bakıda ən yaxşı səhər yeməyi restoranı hansıdır?” və ya “Bu saatda səhər yeməyi təklif edən restoranlar hansıdır?” Məhz buna görədir ki, səsli axtarış və yazılı axtarış arasındakı fərq və dinamikanı nəzərdən keçirmək lazımdır.

Nəticə etibarilə səsli axtarış sorğuları yazılı sorğulardan daha çox axtarış kəlməsi özündə ehtiva edir. Səsli axtarışların uzunluğunun üç-beş açar söz olması ehtimalı artır və daha çox kim, necə, nə, harada, niyə kimi sual sözləri ilə başlayır.

Sualda istifadə olunan sözlərin seçimi istifadəçi niyyəti (user intent) haqqında kontekstual məlumat verir. Bu da öz növbəsində reklamverənlərə istehlakçının satış hunisinin (sales funnel) hansı mərhələsində olduğu haqqında rəməqsal marketinq mütəxəssislərinə daha aydın təsəvvür verə bilər - axtarış edənlər sadəcə məlumat üçün axtarış edirlər, yoxsa pul xərcləməyə hazırdırlar? Məsələn, bir istifadəçi sorğunu bu cür göndərirsə "A brendinin A modeli ilə B brendin B modeli arasındakı fərq nədir?" çox güman ki, araşdırma məqsədli axtarış edir. Ancaq "A brendinin A modelini harada əldə etmək olar?" və ya " B brendinin B modelini haradan ala bilərəm?" kimi sorğular onu göstərir ki, axtarış edən satış hunisinin konversiya mərhələsinə (alışa) yaxındır.

Beləliklə “XYZ nədir?” kimi sorğular üçün edəcəyiniz SEO-dan əldə olunan nəticələr, “XYZ neçəyədir?”, “XYZ haradan ala bilərəm?” sorğuları üçün edəcəyiniz SEO-nun nəticələrindən fərqli olacaq. Səsli axtarışların xüsusiyyətlərini nəzərə alaraq SEO-nu adaptasiya etmək və buna uyğun kontent hazırlamaq lazımdır.

Anar Abdullayev, AzReco şirkəti, marketinq meneceri

Paylaş

MÜSAHİBƏ

Reklam üçün

Sərgi, Konfrans, Festival

Reklam üçün