Analitiklər hesab edirlər ki, gələn il bərpa və yeniliklərlə yadda qalacaq.
Facemark.az "Kantar" mediaya istinadən xəbər verir ki, 25 ölkəni əhatə edən "TGI Global Quick View" sorğusuna əsasən, internetə çıxışı olan istehlakçıların yarıdan çoxu “ötən həftə” ödənişli video xidmətdən istifadə edib. Onların üçdə ikisi (65%) zamanını gündə ən azı 2 saat pullu məzmuna baxmağa sərf edib. Bir sıra siqnallar göstərir ki, pandemiya bitdikdən sonra da izləyicilərin onlayn izləmə marağı hələ də var. Mütəxəssislər də təsdiqləyir ki, axınlar yeni izləyici kateqoriyaları qazanır. Lakin bu məqamda alqoritmlərim rolu artır. Öz növbəsində tamaşaçılar onlara müxtəlif məzmunlara çıxış imkanı verəcək “vahid pəncərə”nin yaranmasında maraqlıdırlar. Bu, həmçinin video platformalarda idman məzmununa (o cümlədən e-sporlara) marağın artdığını göstərir.
Onlayn reklam bazarı müxtəlif alternativ həlləri sınaqdan keçirməli, həmçinin şəxsi məlumatların təhlükəsizliyi və onların emalı üçün istifadəçi razılığının alınması ilə bağlı məsələləri həll etməlidir. Brendlərin 60%-nin fikrincə, yaxın illərdə öz məlumatlarını zənginləşdirmək onlar üçün ən vacib vəzifə olacaq. Ekspertlər gələcəyi hibrid yanaşmada, yəni öz və üçüncü tərəf məlumatlarının birləşməsində görürlər. Bir çox ölkələrin hakimiyyət orqanları texnoloji nəhəngləri cilovlamağa çalışacaq, nəzarətsizlik yerini tənzimləmə və düşünülmüş vergi siyasətinə verəcək.
Rəqəmsal kanallara, xüsusən də e-ticarət və onlayn videoya investisiyaların artırılması marketoloqlar üçün yeni problemlər və yeni suallar yaradır. Hər şeydən əvvəl, brendlər yüksək keyfiyyətli məlumatlarla maraqlanır - çünki sonda onların reputasiyası və böyük pulları təhlükədə ola bilər. Onlar agentliklərlə birlikdə işləməyə hazırdırlar və eyni zamanda rəqiblərin fəaliyyətini təhlil etməyin getdikcə çətinləşdiyini etiraf edirlər. Bunun fonunda birinci tərəf məlumatlarının və ilkin bazar araşdırmalarının rolu artır və istifadəçilərin üstünlükləri media büdcələrinin bölüşdürülməsi ilə bağlı qərarların qəbulunda həlledici amilə çevrilir.
Hazırda pandemiyanın cəmiyyətə, istehlakçı vərdişlərinə və davranışlarına necə təsir etdiyini bildiyimiz üçün, bilikləri praktikada tətbiq etmək və yeni çağırışlara hazırlaşmağın vaxtıdır. "Kantar Barometer" fenomenlər arasında elektron ticarəti, o cümlədən onlayn məhsul almaq vərdişini (2020-ci ilin mayında 21% və 2021-ci ilin sonunda 35%), "Zoom" dan istifadəni, psixi sağlamlıq problemlərini və maliyyə problemlərini qeyd edib. Son tendensiya istehlakçıların malların qiymətinə həssaslığında ifadə olunub: əgər 2020-ci ilin aprel ayında 64% mağazalarda qiymətlərə daha çox diqqət yetirilirdisə, indi 70% təşkil edir.
Məlumatlara, anlayışlara, insanlara və marketinqə sərmayə qoyan brendlər liderliyi təmin edəcək. Əks təqdirdə, müştərilərin dəyişən ehtiyaclarını qabaqcadan görə və qarşılaya bilməyəcəklər. Ekspertlərin fikrincə, indi onlayn və oflayn kanalları necə birləşdirməyi öyrənmək həmişəkindən daha vacibdir, çünki yalnız onların birləşməsi reklam investisiyalarının effektivliyini artıra bilər.
