Apple-ın səhmlərinin dəyəri son iki gündə 6 faizdən çox ucuzlaşıb.

Facemark.az xarici mənbəyə istinadən xəbər verir ki, Çinin dövlət işçilərinə mərkəzi dövlət qurumlarında iPhone-dan istifadəni qadağan etdiyi xəbərindən sonra Apple-ın bazar dəyəri iki gündə 200 milyard dollar itirib.

Bildirilib ki, Çin dövlət strukturlarında və dövlət şirkətlərində iPhone istifadəsinə qoyulan qadağanı genişləndirməyi planlaşdırıb.

Bu tədbir Pekin administrasiyasının texnologiyadan xaricdən asılılığı azaltmaq və kibertəhlükəsizliyi artırmaq üçün son səylərinin bir hissəsi hesab olunur. Maraqlıdır ki, Çinin addımları ABŞ-ın Çin texnologiya şirkəti Huawei və sosial media platforması TikTok-a tətbiq etdiyi oxşar qadağalardan sonra gedir.

ABŞ və Çin arasındakı gərginliyə baxmayaraq, Apple 22 faizlə Çində smartfon satışında ən böyük paya sahibdir.

Çində smartfonlarının əhəmiyyətli bir hissəsini subpodratçılar vasitəsilə istehsal edən şirkət gəlirinin 19 faizini də Çin bazarından təmin edir.

Bank of America hesab edir ki, Çin Apple-ın illik iPhone satışlarının 50 milyonunu təşkil edir və belə bir qadağa Apple-a ildə 5-10 milyon ədədə başa gələ bilər.

Çin hökumətindən məsələ ilə bağlı rəsmi açıqlama olmasa da, Apple məsələ ilə bağlı şərh verməkdən imtina edib.