Ölkənin ən böyük banklarından biri olan Bank Respublika, 2021-ci ilin birinci rübü üzrə maliyyə göstəricilərini açıqlayıb. Hesabata əsasən, Bank birinci rübdə yaxşı maliyyə nəticələri nümayiş etdirərək Azərbaycanın bank xidmətləri bazarında lider mövqelərini möhkəmləndirib.

COVID-19 pandemiyası ilə əlaqədar tətbiq olunan karantin tədbirlərinə baxmayaraq, Bank müsbət dinamikanı davam etdirə bilmiş və 2021-ci ilin birinci rübün nəticələrinə, əsasən xalis faiz gəliri 11,3 milyon manat, xalis mənfəəti isə 2,9 milyon manat təşkil etmişdir.

Ötən ilin sonu ilə müqayisədə Bankın aktivləri 7,5% artaraq 1,11 milyard manat təşkil etmişdir ki, bu da Banka ölkənin aparıcı beş bankı sırasında yerini möhkəmləndirməsinə imkan vermişdir. Açıqlanmış hesabatdan həmçinin görünür ki, Bank davamlı inkişaf üçün kifayət qədər yüksək kapital ehtiyatına malikdir. Belə ki, keçən ilin analoji dövrü ilə müqayisədə Bankın məcmu kapitalı 4% artaraq 87,2 milyon manat olmuş və minimum məcmu kapital normasını 75% üstələmişdir.

3 ayın nəticələrinə görə Bankın kredit və depozit portfelləri əhəmiyyətli dərəcədə artım göstərib. Belə ki, bankın depozit portfeli 13% artmışdır ki, bu da müştərilərin banka olan inamının yüksək olduğunu növbəti dəfə nümayiş etdirib. Bankın kredit portfeli 8,4% artmışdır və verilən kreditlərin əsas hissəsi, həm Bank, həm də Azərbaycan iqtisadiyyatı üçün prioritet sahə olan real sektorun kreditləşməsinə yönəldilmişdir. Diqqət çəkən məqamlardan biri odur ki, keçən ilin sonu ilə müqayisədə qeyri-işlək kreditlərin (NPL) bankın ümumi kredit portfelindəki payı da azalaraq 2,2% təşkil etmişdir.

Bundan başqa, Bankın I dərəcəli kapitalın adekvatlıq əmsalı 11,12%, məcmu kapitalın adekvatlıq əmsalı isə 15,61% təşkil edib ki, bu da normadan müvafiq olaraq 2,2 dəfə və 1,7 dəfə çoxdur.

Bank Respublika 1992-ci ildə yaradılıb və Azərbaycanın aparıcı beş bankından biridir. Bankın səhmdarları arasında Almaniyanın ən böyük maliyyə qurumları - DEG İnvestisiya Korporasiyası (KfW və SIDT bank qrupunun üzvü) və Sparkassen International Development Trust (Sparkassen-Finanzgruppe maliyyə qrupunun üzvü) var.

Daha ətraflı məlumatı bankın rəsmi internet saytında, facebook səhifəsində və ya 144 nömrəsinə zəng edərək əldə edə bilərsiniz.