Dekabrın 1-də Təhsil və İqtisadiyyat nazirliklərinin dəstəyi, UNEC-in təşkilatçılığı ilə Dövlət müstəqilliyinin bərpasının 30 illiyinə həsr olunan "UNEC İqtisadi Forumu 2021" başlayıb. Devizi “Zəfər Yolu” olan Forumun iştirakçıları öncə Fəxri xiyabana gələrək ümummilli lider Heydər Əliyevin və görkəmli oftalmoloq alim Zərifə Əliyevanın əziz xatirəsini ehtiramla yad edərək, məzarları önünə əklil və gül dəstələri qoyublar.

Facemark-ın media tərəfdaşı olduğu Forumun birinci paneli “Azərbaycanın gələcək inkişaf strategiyası: qlobal trendlər və yerli faktorlar” mövzusuna həsr olunub. UNEC-in rektoru, Forumun sədri professor Ədalət Muradov iştirakçıları salamlayaraq, tədbiri açıq elan edib. İlk gündə Nobel mükafatı laureatı Aziz Sancarın alimlərlə görüşü keçirilib. Aziz Sancarın bütün elm adamları üçün nümunə ola biləcək həyat və yaradıcılıq, elmi fəaliyyət və ictimai inkişaf yolu vardır. O, ilk türk kimi elm üzrə Nobel mükafatını almaqla Azərbaycan da daxil olmaqla, bütövlükdə türk dünyasının dünya elminin zirvəsində təmsil olunmasını təmin edib.

İkinci xüsusi görüş Polşanın maliyyə naziri postunda çalışmış, bu ölkənin iqtisadiyyatının memarlarından sayılan iqtisadçı professor Qrzeqorz V.Kolodko ilə olub. Professor Kolodko sual-cavab sessiyasında alim və tədqiqatçıları maraqlandıran sualları cavablandırıb.

2 dekabr Forumun ikinci günündə isə Azərbaycan Respublikasının Təhsil Naziri Emin Əmrullayev, Nobel mükafatı laureatı, professor Aziz Sancar, YÖK rəhbəri Erol Özvar, Helmholtz Zentrum München Tədqiqat İnstitutunun professoru Məsud Əfəndiyev, "Ali İqtisadiyyat Məktəbi" Milli Tədqiqat Universitetinin Təhsil İnstitutunun direktoru İsak Froumin iştirakçılarla görüşəcək. Panelin spikerləri bu paneldə post-pandemiya dövründə elm və təhsilin vəziyyətini təhlil edəcək və auditoriyanın suallarını cavablandıracaqlar.

Dekabrın 3-nə kimi davam edəcək Forum çərçivəsində rəsm sərgisi, şəhər gəzintisi, elm adamları ilə görüşlər və s. kimi müxtəlif tədbirlər nəzərdə tutulmuşdur.

Tədbirlə bağlı ətraflı məlumatı unecforum.az saytından və aşağıdakı əlaqə vasitələrindən əldə edə bilərsiniz.

Forumun instagram səhifəsi: Instagram.com/uefbaku

Forumu Facebook səhifəsi: Facebook.com/uefbaku vasitəsilə canlı izləyə bilərsiniz.