Facemark.az Ramin Fərəcullayevin "Azərbaycan Telekanallarının Youtube reytinqi" haqqında araşdırma yazısını təqdim edir!
2022-ci ilin son ayında televiziyaların "Youtube" reytinqi maraqlı rəqəmlərlə yaddaşda qaldı. Öncəliklə onu qeyd edək ki, Laçın-Xankəndi yolundakı aksiyadan canlı bağlantılar dekabr ayında da, xəbər kanallarını lider mövqedə saxlaya bildi.
Dekabr ayının birincisi "İctimai TV" toplam 27,6 milyon baxış ilə yeni rekorda imza atdı. Belə ki, "İTV" ölkəmizdə futbol üzrə dünya çempionatının eksklüziv yayımçısı olmasına görə və aksiyadan silsilə videolar paylaşması sayəsində ilin ən yüksək baxışını məhz dekabr ayında əldə edə bildi.
Reytinq cədvəlində ilk 3 yeri tutan kanalların baxış sayı ilin əksər aylarında bir-birinə yaxın rəqəmlər olsada, dekabr ayında bunun əksinə olaraq 6-7 milyonluq kəskin fərq müşahidə edilmişdir. Buna səbəb kimi ölkə gündəminin futbol və aksiyaya aid videoların zəbt etməsi, eksklüziv yayım kontenti və əsasən ilk iki yeri tutan kanal videolarının trend olmasını göstərə bilərik.
Noyabr ayında 21,9 milyon baxışla ikinci yeri tutan "Xəzər TV" dekabrda bir pillə geriləmişdir. Ötən ayla nisbətdə toplamda 4,9 milyon daha az baxış toplayan telekanalın geriləməsinin əsas səbəbi kimi kanala ən çox baxış gətirən "Komedixana" layihəsinin ötən ayla nisbətdə 2 dəfə daha az baxış toplamasını göstərmək olar.
Oxşar kateqoriyalı kontentə malik "ATV" və "ARB"nin "Youtube" kanalları ay ərzində 4-5-ci yer uğrunda gərgin mübarizə aparmışdır. Ayın ilk 15 günündə ortalama "ARB" ilə bərabər sayda (7,7 milyon) baxış toplayan "ATV" ayın yekununda rəqibini bir pillə və ya 1 milyon baxış üstəliyərək 4-cü yerdə qərarlaşmışdır.
Ölkənin əsas gündəminə çevrilən Laçın-Xankəndi yolundakı aksiyadan reportajlar "AZTV", "REAL TV"nin baxışlarına da müsbət təsir göstərmişdir.
Belə ki, noyabrda 486 min baxış toplayan “REAL TV” 1.2 milyon, 5,1 milyon nəticə göstərən "AZTV" isə dekabrda 9,2 milyon izlənilmişdir.
Reytinq cədvəlində 7-ci yerdə qərarlaşan və ortalama aylıq 5,8 milyon izlənən “CBC AZƏRBAYCAN” rus dilində kontent istehsal etməsinə baxmayaraq kifayət qədər maraq gördüyünü deyə bilərik.
Hərkəsin internet TV kimi tanıdığı ötən aylarda platforma yayımçısı status alan "Baku TV", "APA TV", "Səhiyyə TV" kanallarını təhlil etdikdə sözsüz ki, rus və azərbaycan dilində kontent istehsal edən "Baku TV"ni xüsusi qeyd etmək lazımdır.
Toplam iki kanalla 27 milyon izlənmə əldə edən "Baku TV"ni yerli televiziya kanalları ilə müqayisə etsək ümumi siyahıda 2-ci yerdə olduğunu görə bilərik.
Rus və ingilis dilində kontent istehsalının yerli televiziyaların "Youtube" kanalları üçündə böyük potensialı olduğunu böyük əminliklə deyə bilərik.
Məsələn 1 milyondan çox abunəçisi olan yerli “Kanal13AZ” kanalı ingilis dilində xəbər kontenti istehsal edərək yerli televiziyalardan iki-üç dəfə daha çox yəni aylıq 70 milyondan çox baxış, 20 min dollardan çox gəlir əldə edir. Hazırda əlavə investisiya tələb edən xarici dildə kontent istehsalı gəlir baxımındanda istehsalçılar üçün rentabelli olduğunu deyə bilərik.
