Bakıda Türkiyədə dağıdıcı zəlzələdən zərərçəkənlərə yardım toplanması kampaniyası ilk gün olduğu kimi sürətlə davam edir.
Facemark.az "Report.az" -a istinadən xəbər verir!
Məlum olub ki, bu gün də xeyli sayda insan aksiyaya qoşulub, zərərçəkənlərə yardım gətirib. Universitet tələbələri, eyni zamanda orta məktəb şagirdlərindən ibarət könüllülər geyimləri çeşidləyərək hüquq mühafizə orqanlarının əməkdaşlarına təqdim edirlər. Həmin o yüklər xüsusi təlim keçmiş itlər vasitəsilə yoxlanılaraq daşınması üçün nəzərdə tutulan TIR-lara yüklənilir.
Azərbaycan-Türkiyə Yüzyılı Birlik və Dayanışma Platformasının üzvü Öndər Aksoy açıqlamasında deyib ki, zəlzələ baş verəndən indiyədək Bakıdan Türkiyəyə 117 TIR yardım göndərilib.
Onun sözlərinə görə, artıq bir həftədir ki, zəlzələdən zərərçəkən vətəndaşlar üçün yardım toplama kampaniyası davam edir:
"Toplanan yardımlar könüllülər tərəfindən çeşidləndikdən sonra TIR-lara yüklənir və qardaş ölkəyə yola salınır. Təkcə dünən 26 TIR yardım göndərmişik. Ümumilikdə indiyədək zəlzələ bölgəsinə 117 TIR yardım yola salmışıq. Bu gün isə 10-15 TIR-ın yola salınması nəzərdə tutulur".
Ö.Aksoy təcili tələb olunan vasitələrin adlarını da açıqlayıb:
"Hazırda geyimlərə ehtiyac yoxdur. Daha çox lazım olan məhsullar - qış çadırı, odeyal, generator, qızdırıcı, yatma kombinzonu, aşılıb yığılan yataq, çadırın içərisinə salmaq üçün xalça. Bunlar bizə gələn kimi birbaşa Türkiyəyə yollayırıq".
Qeyd edək ki, fevralın 6-da ocağı Türkiyənin Kahramanmaraş şəhərinin Pazarcık rayonu olan 7,7 maqnitudalı və 9 saat sonra episentri eyni şəhərin Elbistan rayonu olan 7,6 maqnitudalı iki zəlzələ olub. Güclü yeraltı təkanlardan sonra bölgədə 6,6 maqnitudayadək yüzlərlə afterşoklar qeydə alınıb. Təbii fəlakət Türkiyə və Suriyada böyük dağıntı və onminlərlə itkilərə səbəb olub.
