Azərbaycan Sosial Yardım və Maarifləndirmə Proqramının (ASAAP) təşkilatçılığı ilə “28 Cinema” da “Big Brothers Big Sisters” adlı xeyriyyə aksiyası keçiriləcək. “Onlara sevinc bəxş et” sloqanı altında keçirilən aksiyanın əsas məqsədi Bakıdakı uşaq evlərinin uşaqlarını əyləndirmək və onlarla xoş vaxt keçirməkdir.

Aksiyada hər kəs iştirak edə bilər. Bunun üçün iştirakçı yanvarın 26-da keçiriləcək aksiyanın ilk günündə kinoteatra gəlib uşağı bir neçə saatlıq öz himayəsinə götürərək cəmi 10 AZN xərcləməli olacaq. Məbləğə iki ədəd bilet – biri uşağa biri özünüz üçün, popkorn və sendviç daxildir. Bununla da siz onlara sevinc dolu gün və adi yeniyetmə həyatını bəxş etmiş olacaqsınız.

Xeyriyyə aksiyaları ASAAP tərəfindən ənənəvi olaraq keçirilir. Bundan öncə təşkilat Big Brothers Big Sisters Dreamland Burgers, Sweets with the Kids, Amburan pool event of Big Brother, Big Sister aksiyaları keçirmiş və U-17 komandası, AFFA, Unicef kimi təşkilatların layihələrinə qoşulublar.

Qeyd edək ki, “28 Cinema” kinoteatr olmağına baxmayaraq gələcəkdə də bu tipli aksiyalar həyata keçirməklə sosial məsuliyyətli kinoteatr olmaq niyyətindədir.

“28 Cinema” oturacaq yerlərinə görə ölkədə ən böyük kinoteatrdır və Enhanced 4K müasir texnologiyasına əsaslanan, Barco yeni nəslindən olan proyektorlar və 3D Xpand texnologiyalı eynəklər təqdim edir. “28 Cinema” “PLATINUM MOVIE SUITES” zalı daxil olmaqla 6 zaldan ibarətdir və kinoteatrın ərazisində “Blackberry” restoranı və “Cappuccino coffee house” yerləşir.