Martın 17-dən etibarən Azərbaycanın mobil rabitə operatoru Azercell Telecom abunəçiləri Bakının bəzi yerlərində istifadəyə verilmiş yeni Wi-Fi şəbəkəsinin xidmətlərindən istifadə edə bilərlər.
Şəbəkə hələlik Park Bulvar ticarət mərkəzində, Xəzər və Qafqaz universitetlərində quraşdırılıb, gələcəkdə əhatə dairəsinin genişlənidirilməsi nəzərdə tutulur.
Wi-Fi xidmətindən limitsiz olaraq istifadə etmək üçün operatorun abonentləri 9434 qısa nömrəsinə sms (bir sms-in qiyməti 1 qəpikdir) vasitəsilə müvafiq açar sözünü göndərməlidirlər. Bu zaman açar sözü əvəzi abonentin şəbəkədə işləmək üçün seçdiyi müddət yazılır. Bu, 3 saat, 1 gun, 7 gun və ya 30 gun sözləri ola bilər. Cavab mesajında abonentlərə göndərilən istifadəçi adı və şifrə vasitəsilə şəbəkəyə qoşulmaq mümkündür.
Xidmət üçün tarif 3 saatlıq Wi-Fi şəbəkəsi üçün – 1 azn, 1 sutkalıq – 2 azn, 1 həftəlik – 7 azn, 1 ay üçün 19 azn təşkil edir.
Abonent aldığı istifadəçi adı ilə şəbəkəyə ilk dəfə qoşulduğu andan onun seçdiyi müddət hesablanmağa başlayır. Bununla belə, qeyd edək ki, eyni istifadəçi adı ilə eyni vaxtda bir neçə cihazdan şəbəkəyə qoşulmaq mümkün deyil.
