Biz həmişə və hər yerdə loqotiplərlə əhatə olunmuşuq. Hətta adi bir gündə belə gördüyümüz bir sıra markanın loqotipini sadalaya bilərik. Bugünkü dövrdə isə şirkətlər öz loqotiplərində adlardan imtina edirlər. Bu tendensiya isə davam etməkdədir.
Facemark.az Advertolog.ru-ya istinadən yazır ki, belə bir addımı “Mastercard” bu ilin yanvarında atıb. Şirkət 1968-ci ildən bəri ilk dəfə öz loqotipində adlandırmanın olmadığı, kəsişən qırmızı və sarı dairələrdən istifadə edib. Markanın rəsmilərinin özləri isə düşünürdü ki, loqotipin belə formada təkmilləşdirilməsi, brendin kommunikasiya inkişafı üçün olduqca vacibdir. Ödəmə sistemi başqa bir simvol markasına çevrildi.
“Mastercard”ın marketinq və kommunikasiya üzrə direktoru Raca Racamanar isə açıqlamasında deyirdi ki, “Rəqəmsal texnologiyalar dövründə rebrendinq müasir sadəliyi tələb edir. Şirkət markanın inkişafında növbəti addımı həyata keçirməyə hazırdır. 80%-dən çox markanın adlandırması olmadan onun loqotipini tanıyır, elə buna görə də biz brendin təkamülündə növbəti addımı həyata keçirməyə tam hazır idik. Şirkətin zəngin tarixi ilə qürur duyuruq, kəsişən dairələrin adlandırma olmadan mövcudluğunu məmnuniyyətlə elan edirik”.
Avqust ayında isə öz loqotipində adlandırmadan daha bir marka imtina etmişdi. Bu qarğıdalı çipsilərini istehsalçısı, Rusiyada hələ yeni görünməyə başlayan və daha əvvəllər isə Avropa və Amerikada populyarlıq qazanan “Doritos” brendi idi.
“Doritos”dan isə ümid edirlər ki,istehlakçılar asanlıqla klassik atributları tanıyırlar. Ancaq reklam məzmununda adın yerinə “Loqotip burada” (‘’Logo Goes Here’’) nişanı olacaq. Beləliklə, bu marka da “Nike”, “Apple”, “Lacoste” kimi markalara qoşuldu. Amma bu ilk baxışda elə də asan deyil. Sual isə belədir ki, niyə bu cür tendensiya öz mövqeyini bir neçə ildir ki, qoruyur?
XXI əsrdə istehlakçılar sözlərsiz ünsiyyətdə özlərini daha komfort hiss edirlər. Bugünkü dövrdə sözləri Emojilər, GİF-lər, abbreviaturalar əvəz edir. Loqotiplərdə sözlərdən imtina edilməsi gənc nəslin diqqət və loyallığını cəlb etməyə kömək edir. Nə vaxt ki, markanı çox insan tanıyır, bu halda brend belə bir addıma gedə bilər. Nə edirsən et, “Apple”ın loqotipi dünyada ən çox tanınan “alma” olaraq qalacaq. Əksəriyyət brend isə loqotiplərdə adlardan tamamilə asılıdırlar. Buna görə də, sözsüz loqotiplər yeni auditoriyanın qazanmağına hesablanmayıb. Burada əsas məqsəd brend ilə artıq mövcud olan istehlakçılar arasında əlaqələri möhkəmləndirməkdən ibarətdir. Adlandırma olmadan loqotip ingilis dilini bilməyən müştərilərdə belə həmin marka haqqında məlumatının olmasına şərait yaradır. Buna əlavə olaraq, belə yanaşma hədəf kütlə ilə daha dərin duyğusal əlaqə qurmağınıza kömək olur. Həyatın nəbzi gün keçdikdə daha da artır, şirkətlərin isə müştərilər ilə ünsiyyətə keçmələri üçün vaxtları azdır. Buna görə də artıq bir çoxu az informasiya ilə tanına bilən olmağın yollarını axtarırlar.
Belə bir rebrendinqin əsas təhlükəsi isə adsız qalma riskidir. Çünki adın özü loqodan daha çox məna kəsb edir. Bir çoxlarınız yəqin ki, “Logo Quiz” oyununu xatırlayır. Bu oyunda siz şirkətləri loqolarına görə təxmin etməli idiniz. 2012-ci ildə platforma “App Store”də reytinqlərdə birinci olmuşdu. Bu oyun marketoloqlar qarşısında maraqlı və eyni zamanda çətin bir sual da qoydu. Adlandırma olmadan markanın özü nə qədər güclüdür? Maraqlısı budur ki, belə oyunda bir çoxları brendləri loqotiplərinə görə tanısa da, adlarını bilmirdilər.
