“İşsizlikdən sığorta haqqında” Azərbaycan Respublikası Qanununun 14.5-ci maddəsinə, əsasən, sığorta ödənişinin məbləği Azərbaycan Respublikasının Dövlət Statistika Komitəsi tərəfindən müəyyən olunan əvvəlki ildə ölkə üzrə orta aylıq əmək haqqı məbləğindən çox və minimum sığorta ödənişi məbləğindən az ola bilməz.

Facemark.az xəbər verir ki, bu haqda Hesablama Palatasının İşsizlikdən Sığorta Fondunun 2021-ci il büdcə layihəsinə rəyində məlumat verilib.

Bildirilib ki, həmin Qanunun 16-cı maddəsinə, əsasən, minimum sığorta ödənişi ölkə üzrə müəyyən edilmiş minimum aylıq əmək haqqı məbləğinə bərabər tutulur.

Minimum aylıq əmək haqqı 1 oktyabr 2020-ci ildən 250 manat müəyyən edildiyi üçün minimum sığorta ödənişi də həmin tarixdən 250 manat məbləğində götürülür. Hazırda işsizliyə görə sığorta ödənişinin maksimal məbləği isə 544 manat təşkil edir.