Dünən bu tədbir baş tutdu. Yalnız facebookdakı qrupdan olan dəvət sonunda 65 nəfər marketinq və ona yaxın sektorlardan olanlar, qrup üzvləri 18:45-də 28 Cinemada görüşdü. Nə qədər cəhd etsəm də filmin sonuna yaxın çata bildim, amma baxanlar deyir ki, çox qəşəng və mənalı kimi imiş.

Görüşdən sonra da bəzi dostlarımız getsələr də, yerdə qalan 40-dan çox qrup üzvləri ilə yığışıb elə ordaca çay süfrəsi ətrafında maraqlı müzakirələr etdik. Təkcə onu deyim ki, görüşə gələnlər 45 şirkəti təmsil edirdilər. Məncə, çox böyük nəticədir. Və bundan sonrakı görüşlər üçün təkan verir.

Qeyd etmək istədiyim bir sıra məqamlar var:

Marketinqə könül verənlərin mütəmadi olaraq fərqli tədbirlərdə görüşməsi olduqca təqdirəlayiqdir. Bunu etmək lazımdır, bu missiyanı bundan sonra da həm qrup olaraq, həm fərdi olaraq davam etdirəcəyimizə inanıram.

İkinci mühüm məsələ marketerlər arasında olan anlaşmazlıqların aradan qaldırılması, rəqib şirkətlərin səmimi mühitdə müzakirələr aparması üçün bu çox vacibdir. Əminəm ki, gəlmək istəyib gələ bilməyən çox dostlarımız oldu. Onları başa düşmək olar, çünki gərgin bir zamanda və vaxtda çatdırmaq çox çətin görünür. Amma gəlmək istəyib məqsədli şəkildə gəlməyənlər də oldu ki, biz onlara ancaq uğurlar diləyə bilərik. Düşünürəm ki, bu tip yanaşma heç kimə faydalı olmayacaqdır. Gücə güc qatmaq lazımdır, bu üsulla da ölkəmizdə səmimi mühit ən pis halda marketinq ictimaiyyətində yarana bilər. Biz heç nədən asılı olmayaraq bu yolda axıra kimi getməyi çox böyük cəsarət hesab edirik və bacardıqca buna nail olacağıq. Dəstək olan hər kəsə sonsuz təşəkkürlər.

Görüşdə fərqli şirkətlərdən olsa da ümumən Marketing AİR məzunları çoxluq təşkil edirdi. Bu məni və AİR-i olduqca sevindirir. Sevinirik ki, onlar artıq öz şirkətlərində söz sahibi ola biliblər. Elə ordakı müzakirələrdə də bunu açıq sezmək olurdu. Marketing AİR 2-dən sonra vəziyyətin daha da ürəkaçan olacağını görmək indidən çətin deyil. Təşəkkürlər AİRçilər.

Ən mühüm məsələ. Son 3-4 toplu görüşlərdən sonra əmin oldum ki, artıq müəyyən mövzu ətrafında marketinq forumunun keçirilməsinə ehtiyac var. Biz xaricdən deyil, öz yerli marketinq bazarını inkişaf etdirmək üçün yerli yazarlarımız, yerli şirkətlərimizlə birlikdə müəyyən mövzunun müzakirəsinə başlaya bilərik. Bunu FMR TV-də də çox maraqlı işıqlandıra bilərik. Ümumiyyətlə növbəti görüşümüzü mütləq şəkildə videoya çəkmək lazımdır.

Sonda iştirak edən hər kəsə təşəkkür edirəm. İştirak edənlərin adlarını aşağıda qeyd edirəm.

Görüşdən şəkillərə buradan baxa bilərsiniz.