Məhsul kommunikasiyasında stabillik. Bütün dünya məhsullarının qarşıya qoyduğu məqsəd məhsulun dəyərini yaradıb, istehlakçıya daha asan və daha çox, hətta bir neçə dəfə satmaqdır. Lakin, bu hər zaman asan proses olmur və bəzən məhsulun dəyəri ya yaranmır, ya da fərqli istiqamətlərə yönəlir.
Məhsulun bazara ilk təqdimatı önəmlidir. İlk dəfə məhsul nə haqda danışırsa, hədəf kütlənin fikrində uzun müddət o şəkildə xatırlanır. Əgər bu alqı yalnış yöndədirsə, dəyişilməsi üçün ciddi vəsait və zaman lazımdır.
Məhsulu satmaq üçün “ən ucuz” anlayışı ilə təqdim edilib, illərdir bunun dərdini çəkib, axırda milyonlarca pul xərcləyib rebranding edən şirkətlər haqqında dəfələrlə məqalələr, bloglar və kitablar oxumuşuq. Lakin, öncədən məhsulun hədəf kütləsinin bir insight-nı (bu sözün azərbaycanca tərcüməsini tam bilməsəm də, ənənə və ya zəif nöqtə kimi tərcümə etmək olar) kəşf edib həmin insight üzərindən dəyər yaratmaq lazımdır.
Bu aşağıdakı misala bənzəyir. Deyək ki, tanımadığımız bir adamla görüşürük və o adam bizə insan orqanizmindəki bioloji inkişafdan danışırsa həkim, kompyuterlər arası şəbəkənin sürətindən danışırsa İT mühəndis, avtomobillərdən və məhləsindəki davadan danışırsa fikrimizdə avara alqısı yaradır. Məhsul istehlakçılara təqdim edilməmişdən öncə öz kommunikasiya mövzularını seçməli və həmin mövzular çərçivəsində müştərilərlə danışmalıdır.
Deyək ki, məhsul artıq ilk addımlarını atdı və müəyyən istehlakçılarda rekasiya yaradıb diqqətini cəlb etdi. Bəs sonra? Yenidən ikinci dəfə mövzu seçib həmin mövzuda danışmağa ehtiyac yoxdur. Mövzu bir dəfə seçilir və uzun illər həmin çərçivə daxilində istehlakçılarla dialoq qurulur. Ona görə ki, heç bir istehlakçı məhsulun yeni bir reklam kampaniyası təqdim etməsini gözləmir və hər dəfə fərqli mövzulara toxunan kommunikasiya istehlakçıda çaşqınlıq yaradacaq və sonunda məhsul haqqında fikirləri qarışacaq.
Eynilə bir insan kimi: Hər şeyi bilən, heç nəyi bilməyəndir. Deyilən mövzudan fərqli olaraq, reklam kampaniyalarında məhsulun kommunikasiya rəngi də öz rolunu oynayır. Kommunikasiya görsəllərində yerləşdirilən strateji boşluqlar və həmin boşluqların məhsul üçün öncədən seçilmiş rəngdə olması vacibdir. Lakin, bu strateji boşluqların davamlı olaraq eyni rəngdə olması ondan daha da vacibdir.
Qısaca bildirim ki, vahid mövzu və rəngin stabil, fərqli aspektlərdə kommunikasiya edilməsi məhsulun alqısını (perception) yaradır və o zaman istehlakçılar tərəfindən qəbul edilir. Sonda isə bildirim ki, bütün marketoloqların facebook səhifəsini like etdiyii Coca Cola brandi uzun illərdir bir mövzu çərçivəsində və bir rənglə dialoq qurur: Xoşbəxtlik və qırmızı!
