Əziz dostlar, bu il ilk dəfə olaraq Azərbaycanda “Buktreyler Festivalı” keçiriləcək. Festivalın saytı – www.booktrailer.az, facebook səhifəsilə isə bu linkdən tanış ola bilərsiniz – https://www.facebook.com/BooktrailerFest . Festival Beynəlxalq Kitab Günündə, yəni 23 aprel 2016-cı il tarixində keçiriləcək. İlk 3 yerin qalibi Mədəniyyət və Turizm Nazirliyi tərəfindən mükafatlandırılacaq. Çox sevindirci haldır ki, ilk dəfə olacaq bu festivalda “Bugünün Marketinqi” kitabı da iştirak edir.

Buktreyler nədir?

Buktreyler – kitabın məzmununu vizuallaşdırmaqla oxucular arasında təbliğinə istiqamətlənmiş, onun ən parlaq və tanınan anlarını özündə əks etdirən video çarx və ya kitabın məzmunundan bəhs edən qısametrajlı filmdir.

Festivalın məqsədləri

kitab və mütaliənin cəmiyyətimizdə təbliği;

mütaliəyə münasibətin yaradıcı formaların inkişafı və dəstəklənməsi;

kino sahəsində istedadlı və yaradıcı gənclərin (rejissor, operator, rəssam, aktyor, qrimçi və s.) üzə çıxarılması;

buktreylerlərin incəsənət və biznesdə bir istiqamət kimi inkişafı.

Ötən görüşlərimizin birində Toğrul bəy öz təşəbbüsü ilə bizim “Bugünün Marketinqi” kitabını həmin müsabiqəyə təqdim edib. Müsabiqənin yuxarıda yazılan şərtinə görə kitabın mahiyyəti vizuallaşdırılır. Qısa metrajlı (4 dəqiqəlik) video çarx hazırlanır. Kitabımız üçün də artıq belə bir çarx hazırlanıb və müsabiqəyə təqdim edilib. Hərçənd ki, bundan ən son anda xəbər tutdum, amma xoş oldu. Aşağıda Sizə həmin treyleri təqdim edirəm. Ümumiyyətlə seçim münsiflər vasitəsilə aparılır. Treylerin özündə kitabın zibil yeşiyindən tapılması ideyasını çox da bəyənməsəm də məqsədin çatdırılması üsulunu bəyəndim. Buyurun, baxın, Siz də fikrinizi deyin. Yer tutmaq o qədər də önəmli deyil, amma faydalı olmaq üçün çəkilən zəhməti alqışlamaq lazımdır.